बीड (प्रतिनिधी):
बीड शहरातील रस्त्यांची अवस्था गेल्या दहा वर्षांपासून बिकट आहे. नियोजित २२ कोटी रुपयांच्या रस्त्यांची कामे ठेकेदार निवडीच्या वादात अडकली असतानाच, आता पालिकेने केलेल्या तात्पुरत्या मलमपट्टीमुळे नागरिकांच्या जिवावर बेतण्याची वेळ आली आहे. भारतरत्न डॉ. बाबासाहेब आंबेडकर यांच्या जयंतीनिमित्त शहरातील मुख्य रस्त्यांवर टाकलेली ‘कचखडी’ दबाई न केल्यामुळे वाहनचालकांसाठी मृत्यूचा सापळा ठरत आहे.
राजकीय श्रेयवादात विकास रखडला
शहरातील रस्त्यांच्या कामासाठी २२ कोटी रुपयांचे नियोजन करण्यात आले आहे. मात्र, ही कामे कोणत्या ठेकेदाराला द्यायची, यावरून सत्ताधारी आणि प्रशासकीय पातळीवर जोरदार रस्सीखेच सुरू असल्याचे समजते. या राजकीय वादात रस्त्यांची कामे प्रलंबित राहिल्याने सर्वसामान्यांना खड्ड्यातून प्रवास करावा लागत आहे. विशेषतः छत्रपती शिवाजी महाराज चौक ते कारंजा रोड, बलभीम चौक आणि सुभाष रोड कॉर्नर ते सांगली बँक, जिल्हा स्टेडियमकडे जाणाऱ्या प्रमुख रस्त्यांची अवस्था मागील दशकापासून ‘जैसे थे’ आहे.
कचखडी की ‘डोंगर’? अपघातांचे प्रमाण वाढले
आज डॉ. बाबासाहेब आंबेडकर यांची जयंती असल्याने प्रशासनाने घाईघाईत या रस्त्यांवरील खड्डे बुजवण्यासाठी कचखडी टाकली. मात्र, ही खडी पसरवल्यानंतर त्यावर रोलर फिरवून दबाई करणे आवश्यक होते, जे प्रशासनाने सोयीस्करपणे टाळले. अनेक ठिकाणी तर खडीचे डोंगरच्या डोंगर रचल्यागत कचखडी टाकण्यात आली आहे. यामुळे दुचाकींची चाके घसरून किरकोळ व गंभीर अपघातांचे सत्र सुरू झाले आहे.
नागरिकांच्या भावनांशी खेळ
जयंतीच्या पार्श्वभूमीवर रस्ते सुस्थितीत करणे अपेक्षित असताना, केवळ धूळफेक करण्यासाठी हे काम केल्याचा आरोप नागरिक करत आहेत. “जर रस्ता तात्पुरता नीट करायचा होता, तर मुरुम टाकून दबाई करणे किंवा डांबराचा वापर करणे गरजेचे होते. मात्र, थातूरमातूर काम करून जनतेच्या जखमेवर मीठ चोळण्याचे काम पालिका प्रशासनाने केले आहे,” अशा संतप्त प्रतिक्रिया स्थानिक व्यापारी आणि वाहनचालकांनी व्यक्त केल्या आहेत.
जबाबदारी कोणाची?
या कचखडीमुळे एखाद्याचा अपघात होऊन हातपाय मोडल्यास किंवा जीवितहानी झाल्यास त्याची जबाबदारी प्रशासन घेणार का? असा संतप्त सवाल नागरिक विचारत आहेत. पालिकेच्या निवडणुकीत रस्त्यांचा प्रश्न ऐरणीवर होता, मात्र सत्तेत आल्यानंतरही केवळ निविदा प्रक्रियेत वेळ घालवला जात असल्याने बीडकरांमध्ये तीव्र संताप पाहायला मिळत आहे.
“जयंतीचे औचित्य साधून रस्ते नीट करण्याचे नाटक केले जात आहे. दबाई न केलेली खडी ही खड्ड्यांपेक्षाही जास्त धोकादायक ठरत आहे. प्रशासनाने तात्काळ यावर उपाययोजना करावी, अन्यथा आंदोलनाचा पवित्रा घ्यावा लागेल.”
— स्थानिक नागरिक व त्रस्त वाहनचालक.
