बीड:
राष्ट्रवादी काँग्रेसचे ज्येष्ठ नेते आणि माजी आमदार अमरसिंह पंडित यांनी जिल्ह्याच्या सर्वांगीण विकासात आणि पक्ष संघटना मजबूत करण्यात दिलेले योगदान अतुलनीय आहे. त्यांचा दांडगा व्यासंग आणि दांडगा जनसंपर्क लक्षात घेता, आगामी विधानपरिषद निवडणुकीत त्यांना संधी देण्यात यावी, अशी आग्रही मागणी राष्ट्रवादीचे नेते खदीर सय्यद ताडसोन्ना यांनी केली आहे.
या संदर्भात प्रसिद्धीस दिलेल्या पत्रकात खदीर सय्यद ताडसोन्ना यांनी म्हटले आहे की, अमरसिंह पंडित हे केवळ एक नेते नसून सर्वसामान्य कार्यकर्त्याला बळ देणारे आधारस्तंभ आहेत. त्यांच्याकडे असलेला प्रदीर्घ प्रशासकीय कामाचा अनुभव आणि लोकांच्या प्रश्नांची जाण यामुळे पक्षाला नेहमीच बळकटी मिळाली आहे. विशेषतः मराठवाडा आणि बीड जिल्ह्यातील प्रलंबित प्रश्न, सिंचन, शिक्षण आणि रोजगाराचे मुद्दे विधिमंडळात आक्रमकपणे मांडण्यासाठी त्यांच्यासारख्या अनुभवी नेतृत्वाची आज राज्याला आणि जिल्ह्याला नितांत गरज आहे.
पक्षाची बांधणी अधिक मजबूत होईल
सध्याच्या बदलत्या राजकीय परिस्थितीत राष्ट्रवादी काँग्रेस पक्षाची विचारधारा तळागाळापर्यंत पोहोचवण्यासाठी आणि संघटनात्मक बांधणी अधिक घट्ट करण्यासाठी अमरसिंह पंडित यांचे नेतृत्व महत्त्वाचे ठरणार आहे. यापूर्वी आमदार म्हणून काम करताना त्यांनी अनेक विकासकामे मार्गी लावली आहेत. त्यांच्या अनुभवाचा फायदा नव्या पिढीतील कार्यकर्त्यांना आणि पक्षाला व्हावा, या उद्देशाने त्यांना विधानपरिषदेवर पाठवणे आवश्यक असल्याचे मत खदीर सय्यद ताडसोन्ना यांनी व्यक्त केले आहे.
राजकीय वर्तुळात चर्चांना उधाण
खदीर सय्यद ताडसोन्ना यांनी केलेल्या या मागणीमुळे बीड जिल्ह्यासह राजकीय वर्तुळात मोठी चर्चा सुरू झाली आहे. अमरसिंह पंडित यांच्या समर्थकांमध्ये या मागणीमुळे उत्साहाचे वातावरण असून, आता पक्षश्रेष्ठी यावर काय निर्णय घेतात, याकडे सर्वांचे लक्ष लागले आहे. अनुभवी आणि निष्ठावान नेतृत्वाला संधी मिळाल्यास जिल्ह्याच्या विकासाला पुन्हा एकदा गती मिळेल, असा विश्वास कार्यकर्त्यांकडून व्यक्त केला जात आहे.
