बलात्कार व पोक्सोच्या गंभीर गुन्ह्यातील आरोपीस जामीन मंजूर

बीड | प्रतिनिधी :- 

बीड शहर पोलीस ठाण्यात दाखल असलेल्या अपहरण, बलात्कार व पोक्सो कायद्यांतर्गत गंभीर स्वरूपाच्या गुन्ह्यातील आरोपीस बीड येथील मा. अतिरिक्त जिल्हा व सत्र न्यायालयाने दि. ११ सप्टेंबर २०२६ रोजी नियमित जामीन मंजूर केला. सदर प्रकरणात आरोपीवर अल्पवयीन मुलीचे अपहरण करून तिच्यावर बलात्कार केल्याचा आरोप करण्यात आला होता.

या प्रकरणी बीड शहर पोलीस ठाण्यात गुन्हा क्र. १७०/२०२६ दाखल करण्यात आला होता. आरोपीविरुद्ध भारतीय न्याय संहिता (BNS) कलम १३७(२), ६४(२)(आय), ७४ तसेच पोक्सो कायद्याच्या कलम ४, ८ व १३ अन्वये गुन्हा दाखल करण्यात आला होता.

पोलिसांनी गुन्ह्याचा तपास करून आरोपीस अटक केली होती. त्यानंतर आरोपीस न्यायालयीन कोठडीत ठेवण्यात आले होते. आरोपी दि. १५ ऑगस्ट २०२६ पासून न्यायालयीन कोठडीत असल्याचे सांगण्यात आले. यानंतर आरोपीच्या वतीने नियमित जामिनासाठी बीड येथील मा. अतिरिक्त जिल्हा व सत्र न्यायालयात फौजदारी जामीन अर्ज क्र. ९१७/२०२६ दाखल करण्यात आला.

सदर जामीन अर्जावर न्यायालयात सुनावणी झाली. आरोपीच्या वतीने ॲड. पृथ्वीराज एस. जाधव व ॲड. राजन धसे यांनी बाजू मांडत आरोपीस जामीन देण्याची विनंती केली. दोन्ही बाजूंचे म्हणणे ऐकून घेतल्यानंतर मा. अतिरिक्त जिल्हा व सत्र न्यायालय, बीड यांनी दि. ११ सप्टेंबर २०२६ रोजी आरोपीस जामीन मंजूर केला.

या प्रकरणात आरोपीच्या वतीने ॲड. पृथ्वीराज एस. जाधव व ॲड. राजन धसे यांनी काम पाहिले. त्यांना बीड येथील ज्येष्ठ विधिज्ञ ॲड. राजेश देशपांडे यांचे मार्गदर्शन लाभले, तर ॲड. अभिजीत गलधर यांनी सहकार्य केले.

दरम्यान, सदर प्रकरणात आरोपीवर गंभीर आरोप असून, जामीन मंजूर होणे म्हणजे आरोपीवरील आरोप सिद्ध झाले किंवा तो निर्दोष ठरला असा अर्थ होत नाही. प्रकरणाचा पुढील न्यायालयीन प्रवास सुरू राहणार असून, अंतिम निर्णय न्यायालयीन सुनावणीनंतर होईल.